आजचा दिवस माझा आहे
आजचा दिवस माझा आहे
स्वत:ला सिद्ध करण्याचा
तुझ्या खांद्याला खांदा लावून
सोबत पाऊल टाकण्याचा.....
फक्त स्त्री म्हणून केलेली
प्रशंसा मला नको आहे
तुझ्याइतकंच झगडून
मी तुला गाठलं आहे
यशाचं शिखर जसं तू गाठलंय
तसंच गड सर करणारी मी पण आहे
माझ्या यशाचं कारणही
तुझं मला नाकारणं आहे
आधुनिक जगात तुझा दिखावा
मला संधी देण्याचा
पण पाठमोर्या माझ्या अस्तित्त्वावर
मिश्किलपणे हसण्याचा
स्वाभिमान जसा तुझा आहे
तसाच मलाही अभिमान आहे
प्रत्येक वेळेस तू पाण्यात पाहतो मला
पण त्याच पाण्यातला मी सराईत मासा आहे...
शर्यतीत कधीच नव्हते मी
तुझ्या पुढे जाण्याच्या
पण आता उतरावं लागेल शर्यतीत
माझ्या अस्तित्त्वाला जपण्याच्या
कधीच कमीपणा नव्हता मला
तुझ्याकडून शिकताना
तुला नेहमीच भ्रम झाला
तुझ्यामुळेच माझ्या असण्याचा...
एक दिवस तू देतोस मला
मी मुलगी आहे म्हणून काहीतरी करून दाखवण्याचा
पण महिला दिन सोडूनही
प्रत्येक दिवस माझाच आहे...
- कोमल कोरडे.
No comments:
Post a Comment